Əziz izləyicilər! Daha öncə məlumat verdiyimiz kimi hər həftənin çərşənbə günləri “Soyqırımlar insanlığa-bəşəriyyətə qarşı cinayətlərdir” layihəsi çərçivəsində ayrı-ayrı xalqlara, millətlərə qarşı törədilmiş soqırımları, həmçinin mövcud olan soyqırım kompleks və muzeyləri barədə məlumatları paylaşacağıq. Bugün Bosniya müsəlmanlarına qarşı törədilmiş soyqırımı barədə qısa məlumatı Sizlərə təqdim edirik.
Srebrenitsa soyqırımı II dünya müharibəsindən sonra Avropada baş vermiş ən irimiqyaslı qətliam və hüquqi cəhətdən ilk dəfə sənədləşdirilmiş soyqırım aktıdır.
Sovet İttifaqının süqutundan sonra, bütün Avropada sosialist rejimlərinin devrilməsi Yuqoslaviyada dərin iqtisadi böhrana səbəb olmuşdur. 1990-cı ildən etibarən ölkə parçalanaraq respublikalara bölünməyə başlamışdı ki, bu da millətlərarası gərginlik ilə nəticələndi. Müxtəlif iri miqyaslı cinayətlər baş verirdi.Cinayətlərin ən ağırı isə yeni qurulan Bosniyada yaşandı, belə ki, General Ratko Mladic və Serbiya Respublika Ordusu Srebrenitsada “etnik təmizlənmə” cəhdi ilə minlərlə Bosniya müsəlmanlarını qətlə yetirdi. Soyqırım zamanı qadın və uşaqların da qətlə yetirildiyi sənədlərlə sübuta yetirilmişdir. Serb ordusuyla yanaşı “Əqrəblər” adı ilə tanınan Serbiya xüsusi təhlükəsizlik dəstələri də qətliamın törədilməsində iştirak etmişlər. BMT-nin Srebrenitsaya 400 silahlı Hollandiya sülhməramlısı yerləşdirməsinə baxmayaraq soyqırımın qarşısını almaq mümkün olmamışdır.
2006-cı ilə qədər Srebrenitsa ətrafında 42 kütləvi məzarlıq aşkar edilmişdi.Orada olan insan qalıqlarından 2070 nəfər qurbanın kimliyi müəyyən edilmişdir. 7000 torbada saxlanılan cəsəd hissələrinın kimliyi isə hələ də müəyyən edilməmiş qalır. 11 avqust 2006-cı ildə Kamenikada yerləşən kütləvi Srebrenitsa qətliamı məzarlığından daha 1000 cəsədin qalıqları üzə çıxarılmışdır.
