Məmməd Xan Təkinski Azərbaycan Xalq Cümhuriyyəti dövründə müxtəlif vəzifələrdə çalışmış, dövlətinə və xalqına layiqincə xidmət etmiş şəxslərdəndir. 1918-ci il iyulun 15-də Azərbaycan Xalq Cümhuriyyəti hökumətinin qərarı ilə yaradılmış Fövqəladə Təhqiqat Komissiyasının üzvü olan Məmməd xan Təkinski erməni-daşnak qüvvələrinin müsəlman əhalisinə qarşı törətdikləri vəhşiliklərin araşdırılmasında iştirak etmişdir. Daha sonra 1919-cu ilin yanvarında AXC hökumətinin Ermənistanda diplomatik nümayəndəsi təyin edilmişdir. O, Naxçıvan mahalında “erməni idarəçiliyi”nə son qoyulması məsələsinin zəruriliyini dəfələrlə Ermənistandakı beynəlxalq missiyaların qarşısında qaldırmış və Cümhuriyyət hökumətinin bu işə fəal müdaxilə etməsinə çalışmışdır. M.X.Təkinski vəzifəsindən geri çağırıldıqdan sonra Azərbaycan Xalq Cümhuriyyəti Hökumətinin qərarı ilə 1919-cu il oktyabrında xarici işlər nazirinin müavini vəzifəsinə təyin edilmiş və Azərbaycan sovet hakimiyyəti qurulanadək bu vəzifəni icra etmişdir.
