2007-ci ildə Quba şəhərində Qudyalçayın sol sahilində, keçmiş stadion ərazisində tikinti məqsədi ilə aparılan qazıntılar zamanı təsadüf nəticəsində insan sümükləri ilə dolu 2 quyu və 2 arx aşkarlanmışdı. Azərbaycan Milli Elimlər Akademiyası Arxeologiya və Etnoqrafiya İnstitutunun əməkdaşları tərəfindən kütləvi məzarlıqda 2007-ci ilin aprel ayının 8-dən 11-dək ilkin tədqiqat işləri aparılmış və bu yerin 1918-ci ildə erməni quldur dəstələrinin yerli dinc əhaliyə qarşı törətdiyi soyqırımla bağlı olduğu müəyyən edilmişdir.
Azərbaycan Respublikası Prezidenti Adminstasiyasının Soyqırımı Memorial Kompleksi ilə bağlı bəzi məsələlər haqqında 05.06.2017-ci il tarixli sərəncamına əsasən müvafiq Dövlət komissiyası yaradılmışdır. Komissiya kompleksin mövcud vəziyyətini yerində araşdırmışdır. Dövlət komissiyanın qərarına əsasən ərazidəki torpaq sürüşmələri nəticəsində yararsız hala düşdüyü üçün məzarlıqdakı insan sümükləri milli və dini adətlərə uyğun olaraq dəfn edilmişdir. Qeyd edilən ərazidə 2018-ci ilin fevral ayında Soyqırımı qurbanlarının xatirəsini əbədiləşdirmək məqsədilə xatirə abidəsi ucaldılmışdir. Hər il minlərlə insan həmin abidəni ziyarət edərək önünə gül dəstələri düzürlər.
