Azərbaycan Respublikasının Prezidenti cənab İlham Əliyevin 05 yanvar 2021-ci il tarixli Sərəncamına əsasən, dahi Azərbaycan şairi və mütəfəkkiri, bəşəriyyətin bədii fikir salnaməsində yeni səhifə açmış nadir şəxsiyyət Nizami Gəncəvinin anadan olmasının 880 ili ilə əlaqədar olaraq 2021-ci il ölkəmizdə “Nizami Gəncəvi İli ” elan olunmuşdur. / 19 Oktyabr, 2021
Quba şəhərində “Soyqırımı Memorial Kompleksi”nin 2021-ci ilin ikinci yarımili üçün təsdiqlənmiş iş planına uyğun olaraq 17-18 oktyabr tarixlərində Gəncə şəhərinə səfər təşkil edilmişdir.
2021-ci il “Nizami Gəncəvi İli” çərçivəsində reallaşan təcrübə mübadiləsi layihəsində Kompleksin rəhbərliyi və “Elmi Araşdırmalar Ekspozisiya və Fond Şöbəsinin” 14 nəfər əməkdaşı iştirak etmişdir. İlk olaraq əməkdaşlar 2020-ci ilin oktyabr ayında Gəncə şəhərinin Ermənistan Silahlı Qüvvələri tərəfindən raket atəşinə tutularaq dağıdılmış ərazidə olmuş və burada həlak olan günahsız insanların əziz xatirəsi yad edilmişdir.
Təcrübə mübadiləsi layihəsində Quba Soyqırımı Kompleksinin və Gəncə Dövlət Tarix-Mədəniyyət Qoruğunun əməkdaşlarının birgə iştirakları ilə 2 gün ərzində görüş və seminarlar təşkil edilmişdir. Səfər çərçivəsində dahi Azərbaycan şairi Nizami Gəncəvinin Məqbərəsinə, Azərbaycan Xalq Cümhuriyyətinin İstiqlal Muzeyinə və Şah Abbas məscidinə ziyarət təşkil edilmişdir.
