Quba şəhərində "Soyqırımı Memorial Kompleksi"nin təşəbbüsü ilə "1918-ci il Azərbaycanlılara qarşı soyqırımı hadisələri şahid ifadələrində " adlı layihə həyata keçirilir. Layihə çərçivəsində Kompleksin Elmi Araşdırmalar, Ekspozisiya və Fond şöbəsinin əməkdaşları tərəfindən aparılan tədqiqatlar nəticəsində elmi məqalələr hazırlanıb və bu mövzular əsasında 07-12 mart 2025-ci il tarixlərində Zoom platforması üzərindən “Tarixi həqiqətləri unutmayaq” adlı silsilə vebinarlar təşkil edilib.

Layihənin əsas məqsədi Azərbaycanlılara qarşı törədilmiş soyqırımı hadisələrinin şahid ifadələri əsasında araşdırılması, tarixi faktların öyrənilməsi və ictimaiyyətə çatdırılmasıdır. Elmi tədqiqatlar əsasında aparılan çıxışlar zamanı Kompleksin əməkdaşları Quba, Şamaxı, Bakı və Qarabağ bölgələrində 1918-ci ildə baş vermiş hadisələri şahid ifadələri əsasında təhlil edib və yeni tarixi məlumatlar təqdim ediblər.
Silsilə vebinarların ilk hissəsi 07 mart 2025-ci il tarixində baş tutub. Soyqırımı Memorial Kompleksinin direktor müavini Mehriban Əliyevanın moderatorluğu ilə təşkil olunan birinci vebinarda Məruzəçilər Mehriban Əliyeva (“Quba qəzasında 1918-ci il soyqırımı hadisələri şahid ifadələrində”, Ülkər Zeynalova “Şamaxı qəzasında 1918-ci il soyqırımı hadisələri şahid ifadələrində” və Nurcan Allahverdiyeva “1918-ci il soyqırımı Bakı şəhəri və Bakı kəndlərinin sakinlərinin şahid ifadələrində” mövzularında çıxışlar ediblər. Çıxışlarda Quba, Şamaxı və Bakı qəzasında erməni silahlı birləşmələrinin törətdiyi qırğınlar, həmin dövrdə baş vermis hadisələrə şahid olmuş insanların ifadələri və bu ifadələrin tarixi əhəmiyyəti barədə məlumatlar verilib.
Vebinarda Mədəni İrsin Qorunması, İnkişafı və Bərpası üzrə Dövlət Xidmətinin tabeçiliyində olan qoruqların 40-a yaxın əməkdaşı iştirak etmişdir.