18 May Beynəlxalq Muzeylər Günüdür. Azərbaycan Milli İncəsənət Muzeyi
Əsası 1936-cı ildə qoyulmuş Azərbaycan Milli İncəsənət Muzeyi Azərbaycanın ən böyük muzeylərindən biridir. 1943-cü ildən realist teatr-dekorasiya sənətinin yaradıcılarından biri Rüstəm Mustafayevin adını daşıyan muzeydə 18 mindən çox eksponat saxlanılır.
2011-ci ildən Azərbaycan Respublikası Nazirlər Kabinetinin qərarına əsasən, Azərbaycan Dövlət İncəsənət Muzeyinə Milli Muzey statusu verilmişdir. Muzey iki qonşu tarixi tikilidə – “De Burun malikanəsi” və “Marinski Qadın Gimnaziyası” binalarında yerləşir. Binalar bir-biri ilə müasir üslubda tikilmiş şüşəli korpus vasitəsilə birləşmişdir. Dünya təsviri və tətbiqi sənətinin bütün növlərini yetərincə dolğun şəkildə əks etdirən muzeydə Qərbi Avropa, Rus, İslam, Şərq ölkələri incəsənətinin və milli mədəniyyətimizin çeşidli örnəklərini görmək mümkündür. Muzeydə müxtəlif dövr və üslublara aid rəngkarlıq, qrafika, heykəltaraşlıq, dekorativ-tətbiqi sənət nümunələri (çini, bədii və qiymətli metal, tikmə və xalça) nümayiş olunur.
