Azərbaycan Respublikasının Prezidenti cənab İlham Əliyevin 29 sentyabr 2022-ci il tarixli sərəncamına əsasən 2023-cü il “Heydər Əliyev İli” elan edilmişdir.
Türkiyə Respublikasının Prezidenti Zati-aliləri cənab Rəcəb Tayyib Ərdoğana
Hörmətli cənab Prezident,
Əziz Qardaşım,
Kahramanmaraşda baş vermiş və qardaş Türkiyənin bir çox yerlərində hiss edilmiş güclü zəlzələ nəticəsində çoxsaylı insan tələfatı və dağıntılar barədə xəbər bizi olduqca kədərləndirdi.
Bu ağır məqamda hər cür yardım göstərməyə hazır olduğumuzu bildirir, faciə ilə əlaqədar Sizə, həlak olanların ailələrinə və yaxınlarına, qardaş Türkiyə xalqına öz adımdan və Azərbaycan xalqı adından dərin hüznlə başsağlığı verir, yaralananlara şəfa diləyir, zəlzələnin nəticələrinin tezliklə aradan qaldırılmasını arzulayıram.
Allah rəhmət eləsin!
İlham Əliyev
Azərbaycan Respublikasının Prezidenti
Bakı şəhəri, 6 fevral 2023-cü il
Gənclər Günü münasibətilə muzeylərdə “açıq qapı” olacaq
2 fevral Azərbaycan Gəncləri Günüdür. Prezident Heydər Əliyevin 1997-ci ildə imzaladığı fərmanla əsası qoyulan əlamətdar gün ölkəmizdə hər il müxtəlif tədbirlərlə qeyd olunur.
Azərbaycan Respublikasının Mədəniyyət Nazirliyi tərəfindən gənclərin asudə vaxtının səmərəli təşkili, onların muzey müəssisələri vasitəsilə Azərbaycanın zəngin mədəni irsi ilə yaxından tanış olmalarının təmin edilməsi məqsədilə layihələr həyata keçirilir.
Azərbaycan Gəncləri Günü ilə əlaqədar 1-2 fevral tarixlərində Mədəniyyət Nazirliyinin tabeliyində fəaliyyət göstərən muzeylərdə gənclər üçün “açıq qapı” olacaq.
Bununla əlaqədar həmin günlərdə yaşı 14-dən 29-dək olan şəxslərin muzeylərə sərbəst girişi təmin ediləcək.
20 Yanvar
20 Yanvar – uzun illər sovet imperiyasının əsarətində yaşayan Azərbaycan xalqının azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir.
1990-cı il yanvarın 19-dan 20-ə keçən gecə Bakıya yeridilən sovet qoşun hissələri küçələrə çıxıb imperiyaya qarşı öz etirazlarını bildirən dinc əhalini ağır texnika və müxtəlif tipli silahlardan atəşə tutmuşlar. Buna baxmayaraq, soyuq qış gecəsində Bakının küçə və meydanlarına doluşan insanların o gecə ürəklərinə yalnız bir hiss hakim kəsilmişdir -Azadlıq, Müstəqillik. İnsanların gülləyə tutulduğu, tankların altında əzildiyi həmin gün tariximizin dönüş nöqtəsi oldu, azadlıq yolunda günəş doğdu. Bir qədər sonra isə tarixi məqam yetişdi və Azərbaycan XX əsrdə ikinci dəfə müstəqilliyinə qovuşdu.
20 Yanvar - Ümumxalq Hüzn Günü ilə əlaqədar Quba şəhərində “Soyqırımı Memorial Kompleksi” və Quba Rayon İcra Hakimiyyətinin birgə təşkilatçılığı ilə “20 yanvar həqiqətlərinin dünya ictimaiyyətinə çatdırılmasında Ümummilli Lider Heydər Əliyevin rolu” mövzusunda tədbir keçirilmişdir.
Xalqımızın qan yaddaşı olan 20 yanvar faciəsində qəhrəmancasına şəhid olan, millətimizin azadlığı uğrunda canından keçən şəhidlərimizin xatirəsi 1 dəqiqəlik sükutla yad edilib. Tədbirdə 1990-cı ilin yanvarında sovet imperiyasının qoşun birləşmələrinin Azərbaycan xalqına, dinc əhaliyə qarşı törətdiyi cinayətlərdən, eləcə də ulu öndər Heydər Əliyevin 1990-cı il yanvarın 21-də sovet rejiminin qadağalarına baxmayaraq, həyatını təhlükə qarşısında qoymaqla Azərbaycanın Moskvadakı daimi nümayəndəliyinə gələrək qanlı faciənin təşkilatçılarını dünya ictimaiyyəti qarşısında ittiham etdiyi barədə çıxışlar edilmişdir.
Tarixdə bu gün: 11 yanvar 1920-ci il tarixində Azərbaycan Xalq Cümhuriyyətinin müstəqilliyi Versal Sülh konfransında de-fakto tanınmışdır.
Azərbaycan Parlamentinin sədri Əlimərdan bəy Topçubaşovun başçılıq etdiyi nümayəndə heyəti, Qərb dairələri ilə aparılan bir illik gərgin danışıqlardan sonra müstəqilliyimizin tanınmasına nail olunmuşdu. Belə ki, 1920 –ci il yanvarın 11-də I Dünya müharibəsinin yekunlarına həsr olunmuş Paris sülh konfransının Ali Şurasında Böyük Britaniyanın xarici işlər naziri Kerzonun təklifi ilə Azərbaycan Cümhuriyyətinin tanınması barədə qərar qəbul olundu.
1920-ci il yanvarın 14-də Azərbaycan Cümhuriyyətinin Baş naziri Nəsib Bəy Yusifbəyli Ə.B.Topçubaşova təqdim edilmiş Paris Sülh konfransının rəsmi qərarını vətəndaşlara açıqlamış və həmin tarix Azərbaycan Xalq Cümhuriyyətində qeyri-iş günü elan olunmuşdur. Bakıda bu münasibətlə bayram şənliyi keçirilmiş və parlamentin təntənəli iclası olmuşdur. İclasda Məhəmməd Əmin Rəsulzadə çıxış edərək, nitqini bu sözlərlə bitirmişdir:”Azərbaycan xalqı öz istiqlalını dünyaya tanıtdı. Bir kərə yüksələn bayraq, bir daha enməz!”
Rəxşəndə Bayramova: İndiki Ermənistan ərazisində tarix boyu Azərbaycanlılar yaşayıb
Quba, 28 dekabr, Elxan Yusifli, AZƏRTAC
Ermənistan Qərbi Azərbaycanda bizim bütün tarixi, dini abidələrimizi yerlə-yeksan edib. Bu vaxta kimi həmin ərazilərdə 120 abidənin olması göstərilirdi. Amma Osmanlı arxivlərində aparılan araşdırmalar nəticəsində Qərbi Azərbaycanda 220-dən çox tarixi, mədəni və dini abidə barədə məlumata rast gəlinir. Bu araşdırmalar davam etdirilir. Biz öz keçmişimizə sahib çıxmalıyıq. Ölkə rəhbərliyinin məqsədyönlü siyasəti Qərbi Azərbaycana dönəcəyimiz barədə nikbin düşünməyə əsas verir.
Bu fikirləri AZƏRTAC-ın bölgə müxbirinə müsahibəsində Quba Soyqırımı Memorial Kompleksinin direktoru, tarix üzrə fəlsəfə doktoru Rəxşəndə Bayramova söyləyib.
R.Bayramova bildirib ki, Azərbaycan haqq səsini tarixi faktlar əsasında dünya ictimaiyyətinin diqqətinə çatdırır. Buna görə də ermənilərin tarixi saxtalaşdırmaq cəhdləri fayda verməyəcək.
“Qərbi Azərbaycan tarixi Azərbaycan diyarıdır. Prezident İlham Əliyev dekabrın 24-də Qərbi Azərbaycan İcmasının inzibati binasında yaradılan şəraitlə tanış olan zaman bildirdi ki, Qərbi Azərbaycanın bizim tarixi torpağımız olduğunu bir çox tarixi sənədlər, tarixi xəritələr təsdiqləyir. Azərbaycanlıların öz dədə-baba yurdlarından qovulması yaxın keçmişdə baş verib. Bu hadisələrin canlı şahidləri həyatdadır. Qərbi Azərbaycanda bizim viran qalan kəndlərimizin qalıqları yerindədir. Həmin yerlərdə azərbaycanlılara məxsus qəbiristanlıqlar var. İndiki Ermənistan ərazisində tarix boyu azərbaycanlılar yaşayıb. İndi bütün bunların dünya ictimaiyyətinin diqqətinə çatdırılması istiqamətində işlər başlayıb”, – deyə Rəxşəndə Bayramova söyləyib.
Tarixçi qeyd edib ki, Qərbi Azərbaycanda yaşayan soydaşlarımız qanunsuz olaraq dəfələrlə deportasiyaya məruz qalıblar. İndi onların hüquqlarının bərpa olunması vaxtı gəlib çatıb. Vətən müharibəsində qazandığımız şanlı Qələbə də göstərdi ki, qüdrətli Azərbaycan qarşısına qoyulan məqsədlərə çatmaq üçün bütün imkanlarını səfərbər edə bilir. Vaxt gələcək, Qərbi Azərbaycandan qovulmuş insanlarımızın da doğma yurd həsrəti bitəcək. Tarixi ədalət bərqərar olacaq.
Bu gün Ali Baş Komandan, Prezident cənab İlham Əliyevin doğum günüdür.
Cənab Prezident Sizi 60 illik yubiley münasibətilə təbrik edirik. Sizə uzun ömür, möhkəm cansağlığı, firavanlıq, ölkəmizin rifahı naminə qarşıya qoyduğunuz yeni məqsədlərə nail olmağınızda uğurlar arzulayırıq.
Dövlət Xidmətinin rəisi UNESCO-nun sessiyasında iştirak edib
Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərlinin rəhbərlik etdiyi nümayəndə heyəti Silahlı münaqişə zamanı mədəni mülkiyyətin qorunması üzrə Komitənin 17-ci sessiyasında iştirak etmək məqsədilə Paris şəhərinə səfər edib.
Komitənin budəfəki sessiyasının gündəliyində Katibliyin fəaliyyəti haqqında hesabatın qəbul edilməsi, 1954-cü il Haaqa Konvensiyasının İkinci Protokolunun implementasiyasının monitorinq və nəzarət mexanizmlərinə düzəlişlərin qəbul edilməsi, Ukraynadakı mədəni sərvətlərin qorunması və digər məsələlər öz əksini tapıb.
Müzakirələr zamanı Dövlət Xidmətinin rəisi çıxış edərək, hazırda işğaldan azad olunmuş ərazilərdə Azərbaycan Respublikası Hökuməti tərəfindən işğalçı dövlətin dağıtdığı tarix-mədəniyyət abidələrinin ilkin inventarlaşdırılması və mühafizəsi məqsədilə monitorinqlərin aparıldığını və bərpası üzrə tədbirlərin görüldüyünü diqqətə çatdırıb. Həyata keçirilən monitorinq prosesində əsas maneənin işğaldan azad olunmuş ərazilərin Ermənistan Respublikası tərəfindən minalanması ilə bağlı olduğunu vurğulayıb.
Eyni zamanda, Dövlət Xidmətinin rəsmisi post-münaqişə dövründə tarixi və mədəniyyət abidələrinin qorunması ilə bağlı Azərbaycan tərəfinin gördüyü tədbirləri və təcrübəni digər dövlətlərlə də paylaşmağa hazır olduğunu bildirib. Diqqətə çatdırıb ki, Azərbaycan Respublikası Hökuməti silahlı münaqişələr zamanı mədəni sərvətlərin qorunması mövzusuna xüsusi həssaslıqla yanaşır. Bu məqsədlə Komitənin monitorinq və nəzarət mexanizlərinin yenilənməsi istiqamətində ölkəmizin aktiv iştiakı, eləcə də cari il dekabr ayının 6-9 tarixlərində Bakıda mədəni sərvətlərin qorunması sahəsində UNESCO konvensiyalarının icrasının vacibliyi mövzusunda beynəlxalq konfransın təşkil edilməsi Azərbaycanın bu mövzuya verdiyi önəmin təzahürünün bir nümunəsidir.
Sessiyada Azərbaycan Respublikasının UNESCO yanında Daimi Nümayəndəliyi də iştirak edib.
Sessiyanın sonunda gündəliyin bəndləri üzrə qəbul edilmiş qərarlar əsasında yekun vurulub, gələn il ərzində keçiriləcək növbəti sessiya və məsləhətləşmələr barədə məlumat verilib.
Dövlət Xidmətinin rəisi Romada ICCROM-un baş direktoru ilə görüşüb
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərlinin rəhbərlik etdiyi nümayəndə heyəti İtaliya və Fransaya səfər edib.
Dekabrın 12-də başlayan səfərin məqsədi Romada yerləşən Mədəni Mülkiyyətin Mühafizəsi və Bərpasının Öyrənilməsi üzrə Beynəlxalq Mərkəz (ICCROM) arasında əlaqələrin müxtəlif istiqamətləri üzrə fikir mübadiləsinin aparılması, gələcək əməkdaşlıq perspektivlərinin müzakirə edilməsi, həmçinin UNESCO-nun baş qərargahında (Paris) keçiriləcək Silahlı münaqişə zamanı mədəni sərvətlərin qorunması üzrə Komitənin 17-ci sessiyasında iştirak etməkdir.
Səfər çərçivəsində dekabrın 14-də Azad Cəfərli Roma şəhərində lCCROM-un baş qərargahında təşkilatın baş direktoru Vebber Ndoro ilə görüşüb. Görüşdə Azərbaycan Respublikasının İtaliyadakı Səfirliyinin ikinci katibi Rüstəm Bayramov, Dövlət Xidmətinin baş mütəxəssisi Nəzrin Məmmədova, proqram meneceri Eugene Jo, layihə rəhbəri Rohit Jigyasu, təşkilatın koordinatoru Anna Zeichner iştirak ediblər.
Dövlət Xidmətinin rəisi lCCROM və ölkəmiz arasındakı əməkdaşlığın inkişafı istiqamətində Azərbaycanda həyata keçirilən tədbirlərdən danışıb. İşğaldan azad olunmuş ərazilərdə tarix-mədəniyyət abidələrinin monitorinqi, inventarlaşdırılması, bərpa-quruculuq işləri və infrastruktur layihələrinin icrası haqqında məlumat verib. Post-münaqişə dövründə “Böyük qayıdış” tədbirləri çərçivəsində işğal zamanı dağıdılmış abidələrin qorunması və mühafizəsinə həssaslıqla yanaşıldığını diqqətə çatdırıb.
lCCROM ilə birgə mərkəz Azərbaycan olmaqla abidələrin bərpası və qorunması prosesinin idarə edilməsi, texniki, metodoloji bilik və bacarıqların artırılması üzrə Türkdilli dövlətlərin mütəxəssislərinin iştirakı ilə çoxşaxəli və uzunmüddətli təlimlərin təşkil olunmasının mümkünlüyünü diqqətə çatdırıb.
lCCROM-un baş direktoru Vebber Ndoro isə öz növbəsində ölkəmizdə səfərdə olarkən işğaldan azad olunmuş ərazilərdə, xüsusilə də Şuşa şəhərindəki dağıntıları təəssüflə seyr etdiyini qeyd edib. Baş direktor təlimlərlə bağlı Azərbaycan tərəfinin təkliflərini yüksək dəyərləndirdiyini bildirərək, belə təlimlərin təşkil olunması ilə nümunəvi fəaliyyət və təcrübənin əsasının qoyulacağına inamını ifadə edib. Bununla əlaqədar memorandumun imzalanması və uzunmüddətli əməkdaşlıq proqramının icra edilməsi fikrini dəstəklədiyini vurğulayıb.
Həm işğaldan azad olunmuş ərazilərdə, həm də bütövülükdə ölkə hüdudları daxilində yenidənqurma, inkişaf prosesi çərçivəsində proqramın Azərbaycan tərəfinin şərhlərinə, izahlarına, ehtiyaclarına uyğun olaraq, həmçinin mərkəzi Azərbaycan olmaqla və Türkdilli dövlətlərin iştirakı ilə həyata keçirilməsinin uğurlu nəticələr verəcəyinə ümidvar olduğunu bildirib.
Hər iki tərəfin dəstəklədiyi bu proqramın əlaqələndirilməsi məqsədilə görüşdə əlaqələndiricilər müəyyən edilib, layihələrin hazırlanaraq mübadilə edilməsi və bu addımların yol xəritəsinə uyğun olaraq yerinə yetirilməsi razılığına gəlinib.
Nümayəndə heyətinin səfəri davam edir.
İkinci Dünya müharibəsindən sonra, 9 dekabr 1948-ci ildə BMT Baş Assambleyasında “Soyqırımı cinayətinin xəbərdarlıq edilməsi və cəzalandırılması” haqqında Konvensiyanın qəbul edilməsi ilə Beynəlxalq Soyqırımı Cinayəti Qurbanlarının Xatirəsini Anma Günü kimi qeyd olunmaqdadır.
Qətnamənin həyata keçirilməsində məqsəd soyqırımı qurbanlarının xatirəsini anmaqla yanaşı, dünya ictimaiyyətinin diqqətini bu ağır cinayətin təqsirkarlarının cəzalandırılması və onların qarşısının alınması məsələlərinə cəlb etməkdir.
Azərbaycan xalqı da son 200 ildə bir çox faciələr və soyqırımlarına məruz qalmışdır. Bu dəhşətli hadisələrdən biri Birinci Dünya müharibəsi dövründə Rusiyada yaranmış vəziyyətdən istifadə edən ermənilər öz istəklərinə bolşevizm bayrağı altında nail olmaq cəhdi olmuşdur. Daşnak-bolşevik qüvvələri tərəfindən 1918-ci ilin əvvəllərindən başlayaraq təkcə milli-dini mənsubiyyətinə görə Bakı, Şamaxı Quba, Qarabağ, Zəngəzur, Naxçıvan, Lənkəran və Azərbaycanın digər ərazilərində yaşayan minlərlə dinc müsəlman-türk əhalisi xüsusi qəddarlıqla qətlə yetirilmişdir.
Amma Azərbaycan torpaqlarında erməni vandalizmi bununla bitməmişdir. I Qarabağ müharibəsi gedişatında, 1992-ci il fevralın 25-dən 26-na keçən gecə Ermənistan silahlı qüvvələri tərəfindən törədilən dəhşətli cinayət – Xocalı soyqırımı Azərbaycan tarixinə ən faciəli səhifələrdən biri kimi daxil olmuşdur.
Ulu öndər Heydər Əliyevin “Azərbaycanlıların soyqırımı haqqında” 1998-ci il 26 mart tarixli Fərmanı ilə soyqırımı aktlarına siyasi-hüquqi qiymət verilməsi, Azərbaycan xalqına qarşı törədilmiş bütün soyqırımı faciələrini qeyd etmək məqsədilə 31 mart Azərbaycanlıların Soyqırımı Günü elan edilmişdir.
2013-cü ildən fəaliyyət göstərən Quba Soyqırımı Memorial Kompleksi erməni millətçilərinin 1918-ci ildə bütün Azərbaycan hüdudlarında həyata keçirdikləri cinayətkar əməllərinin dünya ictimaiyyətinə çatdırılması, xalqımızın gələcək nəsillərinin milli yaddaşının qorunması və soyqırımı qurbanlarının xatirəsinin əbədiləşdirilməsi məqsədini özündə daşıyır.
Koreya Respublikasının Azərbaycandakı fövqəladə və səlahiyyətli səfiri Li İn-Yonq Quba şəhərində "Soyqırımı Memorial Kompleksi"ni ziyarət etmişdir. Səfirə ermənilərin azərbaycanlılara qarşı törətdiyi soyqırımlar, erməni vandalizmi barədə məlumat verilmişdir.
Səfirə ermənilərin azərbaycanlılara qarşı törətdiyi soyqırımlar, erməni vandalizmi barədə məlumat verilmişdir.
