8 Noyabr – Zəfər Günü münasibətilə Quba Rayon İcra Hakimiyyətinin təşkilatçılığı ilə ağacəkmə kampaniyası keçirilib. Aksiyada Quba şəhərində “Soyqırımı Memorial Kompleksi”nin rəhbər və əməkdaşları da iştirak ediblər.
9 Noyabr - Dövlət Bayrağı Gününə həsr edilmiş vebinar keçirilib.
Soyqırımı Memorial Kompleksinin təşkilatçılığı ilə “Konstitusiya və Suverenlik İli” çərçivəsində 9 Noyabr – Dövlət Bayrağı Gününə həsr olunmuş vebinar keçirilmişdir. Kompleksin direktor müavini Mehriban Əliyevanın moderatorluğu ilə keçirilən vebinarda Mədəni İrsin Qorunması, İnkişafı və Bərpası üzrə Dövlət Xidmətinin tabeliyində olan müxtəlif qoruqlardan 30-dan çox əməkdaş iştirak edib.Tədbirdə çıxış edən Bakı Avrasiya Universitetinin Sosial və Siyasi Fənlər Kafedrasının dosenti, tarix üzrə fəlsəfə doktoru Pərinaz Sadıqlı, Ali Baş Komandan İlham Əliyevin liderliyi ilə Azərbaycanın qəhrəman ordusunun işğal altında olan torpaqlarını azad edərək, dünya tarixinə qızıl hərflərlə həkk olunan bir zəfər qazandığını bildirib. O, 9 Noyabr Dövlət Bayrağı Gününün, tarixi torpaqlarımızda böyük qürur və fərəh hissi ilə qeyd olunduğunu vurğulayıb.Daha sonra çıxış edən AMEA Z. Bünyadov adına Şərqşünaslıq İnstitutunun aparıcı elmi işçisi, tarix üzrə fəlsəfə doktoru, dosent Sübhan Talıblı müstəqilliyini bərpa etdikdən sonra Azərbaycanın dövlət bayrağının milli suverenliyin simvolu kimi, ölkəmizin bütün vətəndaşları üçün müqəddəs dövlətçilik rəmzlərindən birinə çevrildiyini bildirib.Sonda, mövzu ətrafında fikir mübadiləsi aparılıb.
“Konstitusiya və Suverenlik ili” çərçivəsində, 8 Noyabr-Zəfər Günü, 1918-ci il azərbaycanlılara qarşı soyqırımlara həsr olunmuş “Zəfərə gedən yol” adlı silsilə tədbirlər keçirilib.
2025-ci il “Konstitusiya və Suverenlik ili” çərçivəsində, 8 Noyabr – Zəfər Günü və 1918-ci il azərbaycanlılara qarşı törədilmiş soyqırımlara həsr edilən silsilə tədbirlər Quba, Qusar və Xaçmaz şəhərlərindəki Heydər Əliyev Mərkəzlərində, həmçinin Xaçmaz Tarix Diyarşünaslıq Muzeyində keçirilib. “Zəfərə Gedən Yol” adı altında keçirilən tədbirlərdə mərkəzlərin rəhbərləri – Xaçmaz Heydər Əliyev Mərkəzinin rəhbəri Könül Əskərova, Qusar Heydər Əliyev Mərkəzinin rəhbəri Fatimə Zülfüqarova, Xaçmaz Tarix Diyarşünaslıq Muzeyinin direktoru Pakizə Mehdiyeva və Quba Heydər Əliyev Mərkəzinin kiçik elmi işçisi Şövqiyyə Seyidzadə çıxış edərək keçirilən tədbirlərin bu sahədə işin təşkili üçün önəmli addım olduğunu və hər zaman tarixi həqiqətlərimizin unudulmamasını və gənclərə ötürülməsinin vacibliyini vurğulamışlar. Kompleksin Elmi Araşdırmalar, Ekspozisiya və Fond şöbəsinin əməkdaşı Abutalib Turabov 1918-ci il azərbaycanlıların soyqırımı haqqında ictimaiyyətin, xüsusən də gənclərin maarifləndirilməsinin vacibliyini qeyd etmiş, gənclərimizin beynəlxalq tədbirlərdə erməni yalanlarına cavab vermək və gerçək tarixi faktları açıqlamaq üçün məlumatlı olmalarının əhəmiyyətini vurğulamışdır. Təşkil olunan tədbirlərdə çıxış edən kompleksin mütəxəssisləri Nurcan Allahverdiyeva, Emin Ulubəyov, Orxan Hüseynov, İslam Aslanov və Tərlan Məmmədov 2007-ci ildə Qubada aşkarlanmış kütləvi məzarlıq haqqında məlumat vermiş, 2009-cu ildə Azərbaycan Respublikası Prezidenti İlham Əliyevin sərəncamına əsasən, Heydər Əliyev Fondunun təşəbbüsü ilə kompleksin tikilib istifadəyə verilməsi və rəsmi ziyarətçilər barədə ətraflı məlumat vermişlər. Eyni zamanda qeyd olunmuşdur ki, 2-ci Qarabağ müharibəsi zamanı Yenilməz Ordumuz Müzəffər Ali Baş Komandamızımın rəhbərliyi ilə 44 günlük müharibədə 30 il ərzində düşmən tapdağında olan torpaqlarımızı işğaldan azad etmişdir. Bu günlər ərzində ordumuzun işğalçı erməni ordusuna qarşı apardığı müharibə milli şüurun, xalq və ordu birliyinin təcəssümünə çevrildiyi vurğulanmışdır. Keçirilən tədbirlərdə ümumilikdə 100-dən çox insan iştirak edib. Sonda Kompleks əməkdaşları tərəfindən adı qeyd olunan mərkəzlərin rəhbərliyinə soyqırımı hadisələrini özündə əks etdirən kitab və bukletlər təqdim olunmuşdur.
Azərbaycan Respublikasının Dövlət Turizm Agentliyinin Quba Regional Turizm İdarəsinin təşkilatçılığı ilə 27–31 oktyabr tarixlərində 5 günlük bələdçi təlim proqramı təşkil olunmuşdur.
Təlim müddətində iştirakçılar həm nəzəri, həm də praktiki məşğələlərdə iştirak etmişlər. Onlara turizm sahəsində müasir yanaşmalar, bələdçilik bacarıqları və regionun turizm potensialı barədə dərin biliklər verilmişdir.
Qeyd edək ki, təlim proqramında Quba şəhərində “Soyqırımı Memorial Kompleksi”nin Elmi Araşdırmalar, Ekspozisiya və Fond şöbəsinin əməkdaşları Nurcan Allahverdiyeva, Emin Ulubəyov və Tərlan Məmmədov da iştirak edərək sertifikata layiq görülüblər.
"Muğam"
Muğam – Şərq ölkələrinin klassik xalq yaradıcılığı musiqisinin əsas janrıdır. Azərbaycan muğamı əsrlər boyu xalqımızın bədii-estetik düşüncəsinin ayrılmaz hissəsi olmuşdur.Bu sənət forması zəngin melodik quruluşu,dərin fəlsəfi məzmunu və yüksək ifaçılıq mədəniyyəti ilə seçilir.Muğam təkcə musiqi janrı deyil,həm də milli kimliyimizi və mədəni irsimizi təcəssüm etdirən dəyərdir. Azərbaycan xalq musiqisində 7 əsas, 3 köməkçi muğam var. Əsas muğamlar “Rast”, “Şur”, “Segah”, “Çahargah”, “Bayatı-Şiraz”, “Şüştər” və “Humayun”, köməkçi muğamlar isə “Şahnaz”, “Sarənc” və “2-ci növ Çahargah”dır. Beləliklə, muğam Azərbaycan musiqi mədəniyyətinin ən mühüm sahələrindən biridir. Onun melodik zənginliyi, emosional təsir gücü və dərin fəlsəfi məzmunu xalqımızın estetik düşüncə tərzini formalaşdırmışdır. 2003-cü ildə UNESCO tərəfindən qeyri-maddi mədəni irs siyahısına daxil edilməsi bu sənətin beynəlxalq səviyyədə tanınmasının bariz nümunəsidir.
Latın qrafikalı Azərbaycan əlifbasının bərpası haqqında Azərbaycan Respublikasının Qanunu (25 dekabr 1991) Geniş müzakirə və elmi diskussiyaların nəticəsi olaraq, 1926-cı ildə Bakı şəhərində keçirilən I Ümumittifaq Türkoloji qurultayın tövsiyəsi ilə Azərbaycan xalqı türk xalqları ilə birlikdə latın qrafikalı əlifbanı qəbul etmişdi. Azərbaycan dilinin səs quruluşu ilə uzlaşıb orfoqrafiya qaydalarının sadələşməsinə imkan açan, qısa müddətdə kütləvi savadlanmaya səbəb olan və xalqlar arasında elmi, mədəni əlaqələri genişləşdirən Azərbaycan əlifbası xalqın iradəsinə zidd olaraq, Mərkəzin təzyiqi ilə 1939-cu ildə kiril əlifbası ilə əvəz olunmuşdu. Bu akt 30-cu illərin kütləvi respressiyasının məntiqi davamı olub, türk xalqlarının milli özünüdərk prosesinin qarşısını almaq, onları tədricən yadlaşdırıb bir-birindən uzaqlaşdırmaq məqsədi güdürdü. Azərbaycan Respublikası Ali Sovetinin Milli Şurası yol verilmiş tarixi ədalətsizliyi aradan qaldırmaq üçün qərara alır: 1. «Azərbaycan əlifbasının latından rus əlifbasına keçirilməsi haqqında» 11 iyul 1939-cu il tarixli Azərbaycan SSR-in Qanunu bu gündən qüvvədən düşmüş hesab edilsin. 2. 1940-cı ilə qədər Azərbaycanda istifadə edilən 32 hərfdən ibarət latın qrafikalı Azərbaycan əlifbası kiçik dəyişikliklərlə bərpa olunsun. Azərbaycan Respublikasının Prezidenti Bakı şəhəri, 25 dekabr 1991-ci il № 33
1992-ci il 2 mart tarixində Azərbaycan Respublikası Birləşmiş Millətlər Təşkilatına üzv qəbul olundu. Bu hadisə ölkəmizin beynəlxalq səviyyədə müstəqil dövlət kimi tanınmasının mühüm addımı idi. Azərbaycan həmin gün BMT Nizamnaməsinin öhdəliklərini qəbul edən rəsmi sənədə imza atdı. Bununla da dövlətimiz dünya birliyinin tamhüquqlu üzvünə çevrildi. 2 mart tarixi Azərbaycan diplomatiyasının qlobal arenaya çıxışının simvoluna çevrilib. Bu gün BMT binasında dalğalanan üçrəngli bayrağımız suverenliyimizin ən qürurlu nişanıdır.
"Kəlağayı"
Kəlağayı — Azərbaycan qadınının milli geyiminin ayrılmaz hissəsidir. O, təbii ipək saplardan toxunur və ənənəvi üsullarla bitki boyaları ilə rənglənir. Ən məşhur kəlağayı istehsalı mərkəzləri Basqal, Şəki və Gəncə olub. Kəlağayının üzərindəki naxışlar təsadüfi deyil — hər biri bir mənanı ifadə edir: “buta” bolluq və sevgi, “gül” zəriflik, “sarmaşıq” isə ömür və davamlılıq rəmzidir. Rəngləri də simvolik məna daşıyır: ağ – saflıq, qırmızı – sevgi və enerjini, qara – hüzn və mərhəməti bildirir. Keçmişdə kəlağayı yalnız geyim deyil, həm də dərin mənəvi dəyər daşıyırdı. Qızlara cehiz kimi verilirdi, toyda gəlinin başına qoyulurdu, bəzən barışığın və hörmətin rəmzi kimi təqdim edilirdi.
2014-cü ildə “Azərbaycan kəlağayısı və onun ənənəvi istehsalı sənəti” UNESCO-nun Qeyri-maddi Mədəni İrs Siyahısına daxil edilib. Bu gün də kəlağayı həm milli kimliyimizin, həm də incə sənətkarlığımızın simvolu olaraq qorunur və sevilir.
“Konstitusiya və Suverenlik İli” çərçivəsində 28.10.2025-ci il tarixində Soyqırımı Memorial Kompleksində “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı”ndan irəli gələn vəzifələrin icrası ilə bağlı tədbir keçirilmişdir.
Kompleks əməkdaşlarının iştirakı ilə keçirilən tədbiri giriş sözü ilə açan Kompleksin direktor müavini Mehriban Əliyeva tarix boyu cəmiyyətlərin üzləşdiyi problemlərdən biri olan korrupsiyanın bu gün də bütün dünya ölkələrində aktual problemlərdən biri olaraq qaldığını, ümumi inkişafa və təhlükəsizliyə mənfi təsir göstərdiyini, sosial ədalətə ciddi təhlükə yaratdığını söyləyib. O, Korrupsiyaya qarşı mübarizənin mütəşəkkil və ardıcıl aparılmasının ölkə prezidenti cənab İlham Əliyevin daim diqqət mərkəzində olduğunu diqqətə çatdırıb. Sonda Korrupsiyaya qarşı mübarizə mövzusunda film izlənilib.
8 Noyabr – Zəfər Gününə həsr olunmuş tədbir keçirilib.
8 Noyabr – Zəfər Gününə həsr olunmuş tədbir, Quba şəhərində “Soyqırımı Memorial Kompleksi” və Avey Dövlət Tarix-Mədəniyyət qoruğunun birgə təşkilatçılığı ilə keçirilib. Tədbir, Avey qoruğunun elmi işçisi Rəna Qocayevanın moderatorluğu ilə baş tutub.
Vebinarda Mədəni İrsin Qorunması, İnkişafı və Bərpası üzrə Dövlət Xidmətinin tabeliyində olan müxtəlif qoruqların əməkdaşları da iştirak etmişlər. Vebinarda Azərbaycan xalqının ən müasir tarixinin şanlı bayramlarından biri Zəfər Günü, Azərbaycanın tarixi irsi, vətənpərvərlik ruhu və bu istiqamətdə aparılan maarifləndirici fəaliyyətlər müzakirə olunub.
Tədbirdə çıxış edən Quba şəhərində “Soyqırımı Memorial Kompleksi”nin direktor müavini Mehriban Əliyeva Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında Azərbaycan Ordusu Ermənistanın ardıcıl təxribatlarının və yeni işğal planlarının qarşısını almaq, işğal altında olan torpaqlarımızı azad etmək məqsədilə 2020-ci il sentyabrın 27-dən etibarən başladığı zəfər yürüşündə inanılmaz uğurlar əldə etdiyini bildirib.
Sonda mövzu ətrafında fikir mübadiləsi aparılıb.
20-22 oktyabr 2025-ci il tarixlərində Albaniya Respublikasının Elbasan şəhərində “Balkan, Anadolu, Qafqaz və Türkistan Coğrafiyası İncəsənət, Mədəniyyət, Tarix və Folkloru” mövzusunda V Beynəlxalq Konfrans və sərgi keçirilib. Konfransda Azərbaycan, Türkiyə, Albaniya, Moldova, İtaliya, Özbəkistan, İran, İraq, Belorusiya, Rumıniya, Macarıstan, Şimali Makedoniya, Kosova və digər ölkələri təmsil edən 100-dən çox alim və tədqiqatçı elmi məruzələrlə çıxış edib.
Tədbirdə tarix üzrə fəlsəfə doktoru Fariz Xəlilli “Qədim Qəbələ – UNESCO-nun Dünya İrsi Siyahısına namizəd göstərilmiş unikal arxeoloji şəhər”, Quba şəhərində ” Soyqırım Memorial Kompleksi”nin direltoru tarix üzrə fəlsəfə doktoru Rəxşəndə Bayramova “Böyük Ermənistan xülyası” uğrunda daşnak erməniləri tərəfindən türk-müsəlmanlara qarşı həyata keçirilən Quba soyqırımı (aprel–may 1918-ci il)”, “Avey” Dövlət Tarix-Mədəniyyət Qoruğunun direktoru tarix üzrə fəlsəfə doktoru Səadət Əliyeva “Damcılı mağara düşərgəsində arxeoloji təkamül və mədəni davamlılıq”, “Keşikçidağ” Dövlət Tarix-Mədəniyyət Qoruğunun direktoru Musa Mursaquliyev “Keşikçidağ ərazisində yerləşən Yovşanlıdərə kurqanlarının arxeoloji tədqiqi”, “Çıraqqala-Şabran” Dövlət Tarix-Mədəniyyət Qoruğunun direktoru Günel Pirquliyeva “Çıraqqala: tarixi-arxeoloji tədqiqatlar və bərpa–konservasiya təhlilləri” mövzularında məruzə ediblər. Tədbirin sonunda iştirakçılara sertifikatlar təqdim olunub. Konfrans iştirakçıları Elbasan qalası və Elbasan Etnoqrafiya Muzeyində ekskursiyada iştirak ediblər.
"Aşıq sənəti"
Azərbaycanın qədim və zəngin şifahi mədəniyyətinin əsas tərkib hissəsindən biri də Aşıq sənətidir. Bu sənət, musiqi, poeziya, rəqs və teatrın harmoniya ilə birləşməsindən yaranan unikal bir formadır. Aşıq sənəti, yalnız bir musiqi növü deyil, həm də dərin fəlsəfi və mənəvi bir təcrübədir. Aşıq sənətində ən çox rastlanan şeir janrları qoşma və gəraylıdır. Aşıqlar, sazın müşayiəti ilə öz şeirlərini oxuyur, dastanlar və hekayələr danışır, eləcə də söz sənətini yüksək bacarıqla ifa edərək, xalqın ruhunu və mənəvi dəyərlərini ifadə edirlər. Aşıqlar həm də improvizasiya bacarığına malikdirlər, yəni hər dəfə fərqli məqamları ifadə edə bilirlər. Aşıqlar xalqın dilini və ədəbiyyatını yaşatmaqda mühüm rol oynayırlar. Bu sənət forması, xalqın gündəlik həyatını, tarixini və mədəniyyətini əks etdirən bir çox əsəri özündə cəmləşdirir. Aşıq sənəti, həmçinin bədii ifadə vasitəsi ilə sosial məsələlərə və ictimai həyatda baş verən hadisələrə toxunur.
2009-cu ildə Azərbaycan aşıq yaradıcılığı, UNESCO-nun Qeyri-maddi mədəni irs siyahısına daxil edilib. Bu qərar, aşıq sənətinin beynəlxalq səviyyədə tanınması və qorunmasını təmin edir. Aşıq sənəti, Azərbaycan xalqının mədəniyyətinin bir parçası olaraq gələcək nəsillərə ötürülməkdədir. Bu sənət, yalnız ölkə daxilində deyil, dünya miqyasında da dərin hörmətə layiqdir.
