Posted on

Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin nəzdində fəaliyyət göstərən Quba şəhərində “Soyqırımı Memorial Kompleksi” və Sumqayıt Dövlət Universitetinin Tarix və coğrafiya fakültəsinin birgə təşkilatçılığı ilə azərbaycanlıların soyqırımının 108 illiyinə həsr olunmuş “1918-ci il mart soyqırımı tarixi tədqiqatlarda” adlı elmi-praktik konfrans keçirilib.

Dövlət himninin səsləndirilməsi ilə başlayan konfransda daha sonra ərazi bütövlüyümüz uğrunda həlak olmuş şəhidlərimizin, soyqırımı qurbanlarının əziz xatirəsi bir dəqiqəlik sükutla yad edilib.
Tədbiri giriş sözü ilə açan Kompleksin direktoru Dr. Rəxşəndə Bayramova çıxışında Azərbaycanın tarixi həqiqətlərini, o cümlədən 1918-ci il soyqırımı həqiqətlərinin geniş şəkildə araşdırılmasının, elmi əsaslarla öyrənilməsinin və beynəlxalq ictimaiyyətə çatdırılmasının vacibliyini vurğulamış, bu istiqamətdə həyata keçirilən tədbirlərin əhəmiyyətindən bəhs etmişdir. O bildirib ki, 1918-ci ilin 31 martından başlayaraq Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı Soveti qoşunları və daşnak erməni silahlı dəstələri dinc əhaliyə qarşı soyqırımı törətmişlər. 1918-ci il soyqırımı hadisələrinə hüquqi-siyasi qiymət Ümummilli lider Heydər Əliyevin 1998-ci il 26 mart tarixində imzaladığı “Azərbaycanlıların soyqırımı haqqında” Fərmanla verilmiş və bu sənəddə azərbaycanlıların ermənilər tərəfindən soyqırımına məruz qalması ilk dəfə rəsmi şəkildə bəyan edilmişdir.
Sumqayıt Dövlət Universitetinin Tarix və coğrafiya fakültəsinin dekanı tarix elmləri doktoru, professor Adil Baxşəliyev erməni millətçiləri tərəfindən son 200 ildə, eləcə də 1918-ci il martın 31-də xalqımıza qarşı həyata keçirilən soyqırımı və təcavüzkarlıq siyasətinin əsl mahiyyətindən danışıb. Bildirib ki, azərbaycanlılara qarşı törədilmiş bu soyqırımı tarixin qanlı səhifələrindən biridir. Mart soyqırımı nəticəsində təkcə Bakı şəhərində 12 minə yaxın azərbaycanlı qətlə yetirilib, bütövlükdə Cənubi Qafqazda 50 min nəfərdən çox türk-müsəlman əhali məhv edilib, on minlərlə insan itkin düşüb.
Konfransda SDU-nun Tarix, coğrafiya və metodika kafedrasının müdiri dosent Sona Məhərrəmova “1918-ci ildə Qərbi Azərbaycanda azərbaycanlılara qarşı etnik təmizlmə və deportasiyalar” adlı mövzu ilə çıxış edərək həmin dövrdə baş vermiş faciəvi hadisələrin tarixi mənbələr əsasında təhlilini təqdim etmiş, azərbaycanlı əhaliyə qarşı həyata keçirilən zorakılıq, qırğın və məcburi köçürmələrin səbəb və nəticələrindən geniş bəhs etmişdir. O, çıxışında bu hadisələrin regionun demoqrafik vəziyyətinə ciddi təsir göstərdiyini vurğulamışdır. Daha sonra universitetin Tarix, coğrafiya və metodika kafedrasının dosenti Yusifəli Həsənov “31 mart 1918-ci il soyqırımı: Bakıda törədilən qırğınlar”, Tarix, coğrafiya və metodika kafedrasının dosenti Samir Kərimli “1918-ci ildə Azərbaycanın Şamaxı bölgəsində törədilən qırğınlar”, Tarix və coğrafiya fakültəsinin IV kurs tələbəsi Sona Həsənova “1918-ci ildə Quba bölgəsinda törədilən qırğınlar”, Tarix və coğrafiya fakültəsinin IV kurs tələbəsi Rahil Cəfərov “1918-ci ildə Azərbaycanın Qarabağ bölgəsində törədilən qırğınlar”, Tarix, coğrafiya və metodika kafedrasının baş müəllimi Nofəl Abdullayev “1918-ci il Azərbaycanlıların soyqırımına hüuqi-siyasi qiymətin verilməsi” mövzusunda məruzələrlə çıxış ediblər.
Sonda müəllim və tələbələrə Kompleksin muzeyində soyqırımı ilə bağlı nümayiş etdirilən sənədlər, foto materiallar və arxeoloji tapıntılar haqqında məlumat verilmişdir.
Posted on

Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin nəzdində fəaliyyət göstərən Quba şəhərində “Soyqırımı Memorial Kompleksi”ndə 31 Mart – Azərbaycanlıların Soyqırımı Gününə həsr olunmuş vebinar keçirilib.

Soyqırımı Memorial Kompleksinin direktor müavini Mehriban Əliyevanın moderatorluğu ilə keçirilən vebinarda 1918-ci ilin soyqırımı hadisələrinin tarixi mahiyyəti, Azərbaycan xalqına qarşı törədilmiş qırğınların nəticələri və bu hadisələrin beynəlxalq ictimaiyyətə çatdırılmasının əhəmiyyəti barədə çıxışlar olunub.
Gəncə Dövlət Tarix-mədəniyyət qoruğunun elmi işçisi Vəfa Əliyeva çıxış edərək 1918-ci ilin mart hadisələrinin tarixi faktlar əsasında araşdırılmasının vacibliyini vurğulamış, həmin dövrdə azərbaycanlılara qarşı törədilən qırğınların yaddaşlarda yaşadılmasının və gələcək nəsillərə çatdırılmasının əhəmiyyətindən danışmışdır.
Daha sonra çıxış edən Quba şəhərində “Soyqırımı Memorial Kompleksi”nin mütəxəssisi tarix üzrə fəlsəfə doktoru Təhminə Əliyeva 1918-ci ildə Quba və ətraf bölgələrdə azərbaycanlı əhaliyə qarşı törədilmiş qırğınlar, aparılan arxeoloji tədqiqatlar və kütləvi məzarlıqların aşkar olunmasının tarixi əhəmiyyəti barədə vebinar iştirakçılarına ətraflı məlumat verib.
Vebinarda Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeçiliyində fəaliyyət göstərən qoruqların ümumilikdə 30-a yaxın əməkdaşı iştirak edib.

Posted on

“1918-ci il azərbaycanlılara qarşı törədilmiş soyqırımı hadisələri” adlı növbəti vebinar keçirilib

Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində olan Quba şəhərində “Soyqırımı Memorial Kompleksi”nin təşkilatçılığı ilə “1918-ci il azərbaycanlılara qarşı törədilmiş soyqırımı hadisələri” adlı növbəti vebinar keçirilib. Kompleksin direktor müavini Mehriban Əliyevanın moderatorluğu ilə keçirilən tədbirdə çıxış edən kompleksin əməkdaşı Orxan Hüseynov kompleksin yaradılması və fəaliyyəti barədə məlumat verərək vebinar iştirakçılarını kompleksin muzeyi ilə də tanış edib. O bildirib ki, ötən əsrin əvvəllərində erməni-daşnak quldur dəstələrinin Azərbaycan torpaqlarında həyata keçirdikləri kütləvi etnik təmizləmə və təcavüz siyasəti nəticəsində Bakı, Quba, Qarabağ, Şamaxı, Kürdəmir, Salyan, Lənkəran və digər bölgələrdə on minlərlə günahsız azərbaycanlı qətlə yetirilmiş, xalqımıza qarşı XX yüzilliyin ən faciəli soyqırımlarından biri törədilmişdir. Təkcə Quba qəzasında 1918-ci ilin aprel-may ayları ərzində 167 kənd tamamilə dağıdılmışdır. Quba şəhərində yerləşən kütləvi məzarlıqda soyqırımı nəticəsində hədsiz amansızlıq və xüsusi qəddarlıqla öldürülən azərbaycanlılarla yanaşı, ləzgilərin, yəhudilərin, tatların və digər milli azlıqlara mənsub minlərlə insanın da zorakılığa məruz qaldığı aşkar edilmişdir. Sonda iştirakçıları maraqlandıran suallar ətrafında fikir mübadiləsi aparılıb. Qeyd edək ki, vebinarda Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən qoruqlardan 20-dən çox əməkdaş iştirak edib.

Posted on

Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin nəzdində fəaliyyət göstərən Quba şəhərində “Soyqırımı Memorial Kompleksi”ndə 31 Mart – Azərbaycanlıların Soyqırımı Gününə həsr olunmuş maarifləndirici tədbir keçirilib.

Tədbirdə Soyqırımı Memorial Kompleksinin əməkdaşları, eləcə də Azərbaycan Dövlət Pedaqoji Universitetinin Quba filialının müəllim və tələbələri iştirak ediblər.
Tədbiri giriş sözü ilə açan Soyqırımı Memorial Kompleksinin direktor müavini Mehriban Əliyeva Azərbaycan tarixinin faciəli səhifələrindən biri olan 1918-ci il hadisələrinin öyrənilməsinin və gələcək nəsillərə çatdırılmasının vacibliyindən danışıb. O, eyni zamanda Kompleksin fəaliyyəti barədə iştirakçılara məlumat verib.
Daha sonra Azərbaycan Dövlət Pedaqoji Universitetinin Quba filialının tarix müəllimi Fərmanzadə Bikə çıxış edərək 1918-ci il hadisələrinin təkcə Azərbaycan üçün deyil, ümumilikdə regionun tarixində dərin iz buraxdığını vurğulayıb. Bildirilib ki, tələbələrin bu kimi tədbirlərdə iştirakı onların tarixi mənbələrə əsaslanan biliklərini genişləndirir, həmçinin vətənpərvərlik və vətəndaşlıq məsuliyyəti hisslərinin formalaşmasına müsbət təsir göstərir.
Tədbir çərçivəsində memorial kompleksin əməkdaşı Nurcan Allahverdiyeva tərəfindən 1918-ci il soyqırımı Bakı şəhəri və Bakı kəndlərinin sakinlərinin şahid ifadələrində (Fövqəladə Təhqiqat Komissiyasının sənədləri əsasında) mövzusunda təqdimat keçirilib. Təqdimatda arxiv materialları, elmi araşdırmalar və müxtəlif mənbələr əsasında 1918-ci ildə baş vermiş hadisələrin tarixi konteksti barədə iştirakçılara ətraflı məlumat verilib.
Sonda tələbələr memorial kompleksin ekspozisiya zalları ilə tanış olub, soyqırımı ilə bağlı nümayiş etdirilən sənədlər, foto materiallar və arxeoloji tapıntılar haqqında məlumat əldə ediblər.
Posted on

Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin nəzdində fəaliyyət göstərən Quba şəhərində “Soyqırımı Memorial Kompleksi”ndə azərbaycanlılara qarşı törədilmiş soyqırımların 108-ci ildönümü münasibətilə tədbir təşkil olunub.

Tədbirdə Soyqırımı Memorial Kompleksinin elmi şöbə əməkdaşları və Quba rayon Fizika, riyaziyyat və informatika liseyinin müəllim və şagirdləri iştirak ediblər.
Giriş sözü ilə çıxış edən Soyqırımı Memorial Kompleksinin direktoru Dr Rəxşəndə Bayramova Kompleksin fəaliyyəti haqqında danışmış, eləcə də 1918-ci il hadisələrinin xatırlanması və bu barədə gənc nəslin məlumatlandırılmasının mühüm əhəmiyyət kəsb etdiyini bildirmişdir. O qeyd edib ki, Memorial kompleksdə keçirilən maarifləndirici tədbirlər şagirdlərin tarixi faktlarla yaxından tanış olmasına, həmin dövrdə baş vermiş hadisələri daha dərindən dərk etməsinə xidmət edir
Quba FRİTL-ın tarix müəllimi tarix üzrə fəlsəfə doktoru Əfşan Nərimanlı çıxış edərək 1918-ci il hadisələrinin Azərbaycan tarixində ən faciəli səhifələrdən biri olduğunu vurğulayıb. O qeyd edib ki, gənc nəslin tarixi həqiqətlər barədə məlumatlandırılması, milli yaddaşın qorunması və soyqırımı qurbanlarının xatirəsinin yaşadılması mühüm əhəmiyyət kəsb edir. Ə.Nərimanlı şagirdlərə tariximizi dərindən öyrənməyin vacibliyini xatırladaraq belə tədbirlərin vətənpərvərlik ruhunun formalaşmasında böyük rol oynadığını bildirib. Daha sonra Soyqırımı Memorial Kompleksinin Elmi Araşdırmalar, Ekspozisiya və Fond şöbəsinin əməkdaşı Səriyyə Abidova “1918-ci il soyqırımlarına şahidlik etmiş etnik qrupların ifadələri” mövzusunda məruzəsi ilə çıxış edib. O, 1918-ci ildə Azərbaycan ərazisində baş vermiş faciəli hadisələr, həmin dövrdə müxtəlif etnik qrupların şahid ifadələri və arxiv materialları əsasında aparılan araşdırmalar haqqında şagirdlərə ətraflı məlumat verib.
Tədbir çərçivəsində şagirdlər memorial kompleksin ekspozisiya zalları ilə də tanış olub, soyqırımı ilə bağlı təqdim olunan materiallar və tarixi faktlar haqqında məlumat əldə ediblər.
Posted on

"Gülüstan Sarayı"

Gülüstan Sarayı Bakının ən görkəmli memarlıq nümunələrindən biri kimi paytaxtın mədəni həyatında mühüm yer tutur. Xəzər dənizinə açılan mövqeyi və şəhərin mərkəzinə yaxın yerləşməsi bu binaya xüsusi estetik dəyər qazandırır. Saray rəsmi dövlət tədbirlərinin, beynəlxalq forumların və mötəbər görüşlərin keçirildiyi əsas məkanlardan biri kimi tanınır. Müasir memarlıq üslubunda inşa edilmiş bina həm monumental görünüşü, həm də funksional quruluşu ilə seçilir.
Gülüstan Sarayının tikintisi XX əsrin sonlarında həyata keçirilmiş və qısa müddətdə Bakının simvolik məkanlarından birinə çevrilmişdir. Geniş və işıqlı zalı böyük auditoriyaların qəbuluna imkan yaradır. Burada keçirilən konfranslar, mədəni proqramlar və rəsmi mərasimlər ölkənin ictimai-siyasi həyatında mühüm rol oynayır. Sarayın interyeri zərif dekor elementləri və müasir texniki avadanlıqlarla təchiz olunmuşdur.
Böyük pəncərələrdən açılan mənzərə paytaxtın gözəlliyini daha aydın nümayiş etdirir. Gülüstan Sarayı yalnız rəsmi tədbirlər üçün deyil, eyni zamanda konsert və təqdimat mərasimləri üçün də əlverişli məkandır. Yüksək səviyyəli akustik sistem və geniş səhnə burada təşkil olunan proqramların keyfiyyətini artırır.
Müxtəlif illərdə sarayda beynəlxalq əhəmiyyətli tədbirlər və dövlət səviyyəli görüşlər keçirilmişdir. Bu fakt onun ölkənin diplomatik və mədəni həyatındakı əhəmiyyətini bir daha göstərir. Saray həm yerli, həm də xarici qonaqlar üçün Azərbaycanın müasir simasını təcəssüm etdirən məkandır. Onun yerləşdiyi ərazi abadlaşdırılmış və yaşıllıq zolaqları ilə əhatə olunmuşdur.
Gülüstan Sarayı Bakının memarlıq panoramında xüsusi yer tutur və paytaxtın rəsmi mərasimlər məkanı kimi tanınır. Burada keçirilən tədbirlər ölkənin beynəlxalq nüfuzunun möhkəmlənməsinə də töhfə verir. Öz möhtəşəm görünüşü və çoxfunksiyalı imkanları ilə saray Azərbaycanın dövlətçilik ənənələrinin və müasir inkişafının rəmzi kimi çıxış edir.
Posted on

Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Şabran Regional İdarəsinin əməkdaşları üçün “Tarix və mədəniyyət abidələrinin qorunması haqqında Azərbaycan Respublikasının Qanununa edilmiş son dəyişikliklər və Korrupsiyaya qarşı mübarizə haqqında Azərbaycan Respublikasının Qanunu ilə bağlı maarifləndirici görüş keçirilmişdir.

Görüşdə Şabran Regional İdarəsinin əməkdaşları ilə yanaşı, Çıraqqala–Şabran Dövlət Tarix-Mədəniyyət Qoruğu və Quba Soyqırımı Memorial Kompleksinin əməkdaşları da qonaq qismində iştirak etmişlər.
Tədbir çərçivəsində tarix və mədəniyyət abidələrinin qorunması sahəsində qanunvericiliyin tətbiqi, abidələrin mühafizəsi üzrə məsul şəxslərin vəzifələri, həmçinin korrupsiyaya qarşı mübarizə istiqamətində mövcud hüquqi mexanizmlər barədə ətraflı məlumat verilmişdir. Eyni zamanda, abidələrin qorunmasına məsul olan əməkdaşların sualları cavablandırılmış, mövzu ətrafında fikir mübadiləsi aparılmışdır.
Görüş tarix və mədəniyyət abidələrinin mühafizəsi sahəsində hüquqi biliklərin artırılması və bu istiqamətdə fəaliyyətin daha səmərəli təşkili baxımından mühüm əhəmiyyət kəsb etmişdir.
Posted on

“1918-ci il Azərbaycanlılara qarşı törədilmiş soyqırımı hadisələri” adlı növbəti vebinar keçirilib. Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində olan Quba şəhərində “Soyqırımı Memorial Kompleksi”nin təşkilatçılığı ilə “1918-ci il azərbaycanlılara qarşı törədilmiş soyqırımı hadisələri” adlı vebinar keçirilib.

“1918-ci il Azərbaycanlılara qarşı törədilmiş soyqırımı hadisələri” adlı növbəti vebinar keçirilib.
Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində olan Quba şəhərində “Soyqırımı Memorial Kompleksi”nin təşkilatçılığı ilə “1918-ci il azərbaycanlılara qarşı törədilmiş soyqırımı hadisələri” adlı vebinar keçirilib. Kompleksin direktor müavini Mehriban Əliyevanın moderatorluğu ilə keçirilən tədbirdə çıxış edən kompleksin əməkdaşları —Səriyyə Abidova, Ülkər Zeynalova və İslam Aslanov bildiriblər ki, 1918-ci ildə Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı Soveti və daşnak erməni silahlı dəstələri azərbaycanlıları kütləvi şəkildə vəhşicəsinə qətlə yetirmişlər.
Ermənilərin tarix boyu xalqımıza qarşı törətdikləri bütün cinayətlərin cavabı 2020-ci ilin sentyabrında başlayan və 44 gün davam edən Vətən müharibəsində verildi. 200 ildən çoxdur ermənilərin “böyük Ermənistan” xülyası çərçivəsində törətdikləri vəhşiliklərin, şəhidlərimizin qısasını Azərbaycan Ordusu Müzəffər Ali Baş Komandan İlham Əliyevin rəhbərliyi ilə döyüş meydanında aldı. Ermənistanın 30 il davam edən işğalına son qoyuldu, ölkəmizin ərazi bütövlüyü bərpa edildi. Sonda iştirakçıları maraqlandıran suallar ətrafında fikir mübadiləsi aparılıb. Qeyd edək ki, vebinarda Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən qoruqlardan 25-dən çox əməkdaş iştirak edib.

Posted on

“1918-ci il Azərbaycanlılara qarşı törədilmiş soyqırımı hadisələri” adlı vebinar keçirilib.

Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində olan Quba şəhərində “Soyqırımı Memorial Kompleksi”nin təşkilatçılığı ilə “1918-ci il azərbaycanlılara qarşı törədilmiş soyqırımı hadisələri” adlı vebinar keçirilib. Kompleksin direktor müavini Mehriban Əliyevanın moderatorluğu ilə keçirilən tədbirdə çıxış edən kompleksin əməkdaşları — tarix üzrə fəlsəfə doktoru Təhminə Əliyeva, Nurcan Allahverdiyeva və Orxan Hüseynov bildiriblər ki, Erməni millətçiləri tarixin müxtəlif mərhələlərində mifik “Böyük Ermənistan” ideyasını gerçəklədirmək məqsədilə soydaşlarımıza qarşı etnik təmizləmə, deportasiya və soyqırımları həyata keçirmişlər. Azərbaycan xalqının başına gətirilən ən dəhşətli faciələrdən biri də 1918-ci ilin mart-aprel aylarında Bakı Sovetinin mandatı altında fəaliyyət göstərən daşnak-bolşevik silahlı dəstələri tərəfindən xüsusi qəddarlıqla törədilmiş kütləvi qırğınlardır. Həmçinin bildirilmişdir ki, Azərbaycan Xalq Cümhuriyyətinin hökuməti ermənilərin törətdikləri ağır cinayətlərin araşdırılması üçün Fövqəladə İstintaq Komissiyası yaratmış, komissiyanın üzə çıxardığı həqiqətlərin xalqın yaddaşında hifz edilməsi və dünya ictimaiyyətinə çatdırılması üçün bir sıra tədbirlər görmüşdür. Lakin Xalq Cümhuriyyətinin süqutundan sonra bu proses dayandırılmış, baş verənlərin sona qədər təhqiq edilməsinin və ona müvafiq siyasi-hüquqi qiymət verilməsinin qarşısı alınmışdır. Yalnız 80 il sonra – 1998-ci il martın 26-da ümummilli lider Heydər Əliyevin imzaladığı “Azərbaycanlıların soyqırımı haqqında” Azərbaycan Respublikası Prezidentinin Fərmanında həmin dəhşətli hadisələrə adekvat siyasi qiymət verilmiş və 31 mart “Azərbaycanlıların Soyqırımı Günü” elan edilmişdir.

Sonda iştirakçıları maraqlandıran suallar ətrafında fikir mübadiləsi aparılıb. Qeyd edək ki, vebinarda Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən qoruqlardan 35-dən çox əməkdaş iştirak edib.

Posted on

"Kültəpə yaşayış yeri – Azərbaycan tarixinin qədim beşiyi"

Naxçıvan ərazisində yerləşən Kültəpə kəndi Azərbaycanın qədim və zəngin mədəni irsə malik dünya əhəmiyyətli tarixi abidədir. Kültəpə təkcə Azərbaycanın deyil, ümumilikdə Cənubi Qafqazın ən qədim yaşayış məskənlərindən biri hesab olunur. Arxeoloji tədqiqatlar göstərir ki, burada yaşayış e.ə. IV–I minilliklərdə, yəni Eneolit və Tunc dövrlərində mövcud olmuşdur. Bu fakt sübut edir ki, Azərbaycan ərazisi qədim sivilizasiyaların formalaşdığı mühüm mərkəzlərdən biri olmuşdur. Aparılan qazıntılar zamanı burada qədim ev qalıqları, ocaq yerləri, əmək alətləri, saxsı qablar və müxtəlif məişət əşyaları aşkar edilmişdir. Tapılan saxsı məmulatlar göstərir ki, Kültəpə əhalisi dulusçuluqla məşğul olmuş, həmçinin əkinçilik və maldarlıq inkişaf etmişdir. Bu isə həmin dövrdə insanların artıq oturaq həyata keçdiyini sübut edir. Kültəpədə tapılan maddi-mədəniyyət nümunələri qədim insanların dünyagörüşü, təsərrüfat həyatı və ictimai münasibətləri haqqında mühüm məlumat verir. Arxeoloqların fikrincə, bu yaşayış yeri regionda iqtisadi və mədəni əlaqələrin formalaşmasında da mühüm rol oynamışdır. Kültəpə yaşayış yeri Azərbaycan xalqının qədim və zəngin mədəni irsinin parlaq nümunəsidir. Bu abidə göstərir ki, əcdadlarımız minilliklər əvvəl yüksək təsərrüfat və mədəni həyat qurmuşlar. Tarixi irsimizi qorumaq və gələcək nəsillərə ötürmək hər birimizin borcudur.

 

Posted on

"Azərbaycanda bədii keramika sənəti"

Azərbaycanda bədii keramika sənəti
Bədii keramika Azərbaycan sənətkarlığının ən qədim sahələrindən biri olub və bu günə qədər öz əhəmiyyətini saxlamışdır. Bu sənət həm gündəlik həyatın, həm də estetik zövqün tələblərinə xidmət etmişdir. Mütəxəssislərin fikrinə görə sənətin bu sahəsinin meydana çıxması Neolit dövrünə təsadüf edir. Əsasən qadınların məşğul olduğu dulusçuluq eneolit dövründə tətbiq edilən bir sıra texniki nailiyyətlər və bədii təkamül nəticəsində müstəqil sənət sahəsinə çevrilmişdi. Yerli sakinlərdə estetik təsəvvürlərin formalaşması keramik məmulatda da tədricən dekorativ xüsusiyyətlərinin artmasına gətirib çıxarmışdır. Sadə həndəsi və nəbati motivlər əvvəlcə qoruyucu və ovsun mahiyyətli olmuş, tədricən, onların dekorativ xüsusiyyətləri kəşf olunduqca, bəzək sistemlərinə çevrilmişlər.
Azərbaycan keramikaçıları müxtəlif formalar və naxışlarla zəngin dekorativ əsərlər yaratmışlar. Hər bölgənin özünəməxsus üslubu və ornamentləri mövcuddur. Qobustan, Şirvan, Naxçıvan və digər bölgələr keramika istehsalının mərkəzləri olmuşdur. Bədii keramika həm utilitar, həm də bəzək məqsədli əşyalar hazırlamaq üçün istifadə edilmişdir. Keramika alətləri və qab-qacaq nümunələri xalqın gündəlik həyatını əks etdirir. Bu sənət nəsildən-nəslə ötürülərək qorunmuş və yaşadılmışdır. Müasir dövrdə Azərbaycan keramikaçıları həm milli, həm də beynəlxalq sərgilərdə iştirak edirlər. Beləliklə, bədii keramika Azərbaycan mədəni irsinin ayrılmaz və dəyərli hissəsidir.