Posted on

31 Mart Azərbaycanlıların Soyqırımı Günü ərəfəsində Kompleks tərəfindən hazırlanmış 1918-ci il azərbaycanlıların soyqırımını özündə əks etdirən video-çarx Bakı Metropolitenin 27 metro stansiyasında, Azərbaycan Dövlət Reklam Agentliyinin Bakı şəhərində və Respublikanın müxtəlif bölgələrində yerləşdirilən monitorlarında, eləcə də Bakı Nəqliyyat Agentliyində, "28 Mall", "Gənclik Mall", "Metropark" ticarət mərkəzlərində, eləcə də regionda yerləşən hotellərdə quraşdırılan monitorlarında nümayiş olunmuşdur.

Posted on

31 mart azərbaycanlılara qarşı törədilmiş soyqırımların 107-ci ildönümü ilə bağlı anım tədbiri

2007-ci ilin aprel ayında Quba şəhər stadionunda təmir-qazıntı işləri aparılarkən aşkar edilmiş kütləvi məzarlıqdakı insan qalıqlarının 1918-ci ildə erməni daşnak-quldur dəstələri tərəfindən soyqırıma məruz qalmış yerli dinc əhaliyə aid olduğu müəyyən edilmişdir. Bundan bir qədər sonra Azərbaycan Respublikasının Prezidenti cənab İlham Əliyevin 30 dekabr 2009-cu il tarixli 673№-li sərəncamına əsasən, 2012-2013-cü illərdə Heydər Əliyev Fondunun dəstəyi ilə Quba şəhərində “Soyqırım Memorial Kompleksi” inşa edilmişdir. 2013-cü il sentyabr ayının 18-də Prezident İlham Əliyevin iştirakı ilə açılmış Soyqırımı Memorial Kompleksini ötən 12 il ərzində 200 mindən çox xarici ziyarətçi olmaqla 1 milyondan çox insan ziyarət etmişdir. Soyqırımı Memorial Kompleksi dövlətimizdə erməni vandalizmini özündə əks etdirən yeganə ideoloji mərkəzdir. Kompleksin əsas missiyası erməni qəddarlığını olduğu kimi bəyan etmək və Azərbaycan həqiqətlərini həm yerli, həm də beynəlxalq səviyyədə təbliğ etməkdir.
31 mart azərbaycanlılara qarşı törədilmiş soyqırımların 107-ci ildönümü ilə bağlı Soyqırımı Memorial Kompleksində Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti, Quba Rayonu İcra Hakimiyyəti və Quba şəhərində “Soyqırımı Memorial Kompleksi”nin birgə təşkilatçılığı ilə anım tədbiri keçirilib. Tədbirdə Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi xanım Səbinə Hacıyeva, Quba Rayon İcra hakimiyyətinin başçısı cənab İlqar Mahmudov, yerli idarə-müəssisə rəhbərləri, eləcə də rayon ictimaiyyəti iştirak etmişlər.
İlk olaraq tədbir iştirakçıları Ümummilli lider Heydər Əliyevin abidəsinin ziyarət edərək abidənin önünə gül-çiçək dəstələri düzmüşlər. Daha sonra tədbir iştirakçıları Kompleksin ərazisində yerləşən xatirə abidəsini ziyarət etmişlər.
Kompleksin muzey hissəsi ilə tanış olan tədbir iştirakçıları əməkdar rəssam Adil Şıxəliyevin müşaiyəti ilə rəssamın 1918-ci il azərbaycanlıların soyqırımlarına həsr olunmuş əsərlərindən ibarət “Mələklərin Fəryadı” adlı qobelen sərgisi ilə tanış olmuşlar, həmçinin sərgiyə gələnlərə Quba Rayon İcra Hakimiyyəti tərəfindən sərgi ilə əlaqədar hazırlanmış kitabçalar təqdim edilmişdir.
Tədbir iştirakçıları həmçinin Kompleks əməkdaşlarının ötən il ərzində əldə etdikləri uğur və nəticələri özündə əks etdirən sertifikat və diplomlarla da tanış olmuşlar.
Axşam saatlarınadək davam edən anım tədbirinə mərkəzi və yerli İcra Hakimiyyəti orqanları, idarə-müəssisə və təşkilat rəhbər və əməkdaşları, media nümayəndələri, tələbə və gənclər, eləcə də onminlərlə insan qatılmışdır.
Xatırladaq ki, adı qeyd olunan sərgi 2 ay müddətində Soyqırımı Memorial Kompleksində nümayiş olunacaq.
Posted on

Dini Qurumlarla İş üzrə Dövlət Komitəsinin Quba-Xaçmaz regional bölməsinin, Quba Rayon İcra Hakimiyyətinin, Soyqırımı Memorial Kompleksinin və Qafqaz Müsəlmanları İdarəsinin Quba və Qusar rayonları üzrə qazılığının birgə təşəbbüsü ilə din xadimlərin və dini icmaların nümayəndələrinin Quba şəhərində "Soyqırımı Memorial Kompleksi"nə ziyarəti təşkil olunub.

Soyqırımına məruz qalmış həmvətənlərimizin əziz xatirəsi anılaraq, din xadimləri tərəfindən dualar oxunduqdan sonra ziyarətçilərə ətraflı məlumat verilib.
Daha sonra Soyqırımı Memorial Kompleksində əməkdar rəssam Adil Şıxəliyevin əsərlərindən ibarət, soyqırımın dərin təsirini əks etdirən “Mələklərin fəryadı” adlı sərgisi ilə tanış olunmuş, sərgidə nümayış olunan əsərlər haqqında məlumat verilmişdir.
Posted on

Quba şəhərində Soyqırımı Memorial Kompleksi, Azərbaycan Milli QHT Forumunun birgə təşkilatçılığı ilə 1918-ci il azərbaycanlılara qarşı soyqırımın 107-ci ildönümü ilə əlaqədar olaraq tədbir keçirilib. Azərbaycanın suverenliyi uğrunda canlarını fəda etmiş qəhrəman oğul və qızlarımızın əziz xatirəsi bir dəqiqəlik sükutla anıldıqdan sonra azərbaycanlılara qarşı törədilmiş soyqırımları özündə əks etdirən video nümayiş olunub.

Çıxış edən Kompleksin direktor müavini Mehriban Əliyeva XX əsrin əvvəllərində tarixi azərbaycan torpaqlarında erməni daşnakları tərəfindən baş vermiş soyqırımı, etnik təmizləmə siyasəti haqqında məlumat verərək bildirmişdir ki, soyqırımı təkcə bir millətə qarşı olan cinayət deyil, bəşəri bir cinayətdir. Daha sonra çıxış edən Milli QHT Forumunun İdarə Heyətinin sədri Ramil İsgəndərli bu kimi tədbirlərin əhəmiyyətli olduğunu vurğulayaraq 44 günlük Vətən Müharibəsində Azərbaycanın dünyaya səs saldığını qeyd etdi. Daha sonra çıxış edənlər mövzu ətrafında fikirlərini qeyd ediblər.
Qeyd edək ki, tədbirdə Milli QHT Forumunun nümayəndələri, şəhid ailələri və Kompleks əməkdaşları iştirak ediblər.
Posted on

Quba şəhərində “Soyqırımı Memorial Kompleksi”, Gənclərin İnkişaf və Karyera Mərkəzinin Quba-Xaçmaz regional nümayəndəliyinin birgə təşkilatçılığı ilə 1918-ci il azərbaycanlıların soyqırımının 107-ci ildönümü ilə əlaqədar olaraq tədbir təşkil olunub.

Tədbir Azərbaycanın ərazi bütövlüyü uğrunda canlarından keçmiş qəhrəman soydaşlarımızın əziz xatirəsinin bir dəqiqəlik sükutla yad edilməsi ilə başlayıb. Tədbiri giriş sözü ilə açan Kompleksin direktor müavini Mehriban Əliyeva Kompleksin fəaliyyəti, 1918-ci ildə baş vermiş soyqırımlar haqqında ətraflı Məlumat vermişdir.
Çıxış edənlər – Gənclərin İnkişaf və Karyera Mərkəzinin Quba-Xaçmaz regional nümayəndəliyinin koordinatoru Eyvaz Xeyrullayev, Gənclərin İnkişaf və Karyera Mərkəzinin Quba-Xaçmaz regional nümayəndəliyinin Xaçmaz bölməsinin mütəxəssisi Ceyhun Fərzəliyev, Quba Dövlət Sosial-İqtisadi Kollecinin Tələbə Gənclər Təşkilatının sədri Mətanət Məmmədova,Soyqırımı Memorial Kompleksinin EAEF şöbəsinin əməkdaşı Səriyyə Abidova – hər biri mövzu ətrafında öz məruzələri ilə çıxışlar ediblər.
Posted on

Quba şəhərində “Soyqırımı Memorial Kompleksi”, Mədəniyyət İşçiləri Həmkarlar İttifaqı Xaçmaz və Quba rayon Komitələrinin və Xaçmaz Tarix-Diyarşünaslıq Muzeyinin birgə təşkilatçılığı ilə 1918-ci il azərbaycanlıların soyqırımının 107-ci ildönümü ilə əlaqədar olaraq tədbir təşkil olunub.

Azərbaycanın ərazi bütövlüyü uğrunda canlarını fəda etmiş qəhrəman soydaşlarımızın əziz xatirəsi bir dəqiqəlik sükutla anıldıqdan sonra Azərbaycanlılara qarşı törədilən soyqırımları özündə əks etdirən sənədli film nümayiş olundu. Kompleksin Elmi Araşdırmalar, Ekspozisiya və Fond şöbəsinin müdiri Lətafət Beybutovanın moderatorluğu ilə keçirilən tədbirdə çıxış edən Kompleksin direktoru Dr.Rəxşəndə Bayramova XX əsrin əvvəllərində azərbaycanlılara qarşı törədilmiş soyqırımlar, eləcə də kompleksin fəaliyyəti haqqında ətraflı məlumat vermişdir. Çıxış edən natiqlər – Mədəniyyət İşçiləri Həmkarlar İttifaqı Xaçmaz və Quba rayon Komitələrinin sədrləri Qərib Umudov, Məhərrəm Hacıyev, Xaçmaz Tarix-Diyarşünaslıq Muzeyinin direktoru Pakizə Mehdiyeva, əməkdar jurnalist Azər Həsrət və Kompleksin direktor müavini Mehriban Əliyeva Soyqırımı Memorial Kompleksinin erməni vandalizmini dünya ictimaiyyətinə təbliğ olunmasında xüsusi rol oynadığını qeyd edərək bildirdilər ki, Azərbaycan dövlət müstəqilliyini bərpa etdikdən sonra xalqımızın tarixi keçmişinin obyektiv mənzərəsini ortaya qoymaq imkanı yarandı. Uzun illər gizli saxlanılan, üzərinə qadağa qoyulmuş həqiqətlər bir-bir açıldı. Ulu öndər Heydər Əliyevin “Azərbaycanlıların soyqırımı haqqında” 1998-ci il 26 mart tarixli Fərmanı ilə soyqırımı aktlarına siyasi-hüquqi qiymət verilməsi bu sahədə aparılan tədqiqatlara, həqiqətin üzə çıxarılması istiqamətində səylərin artırılmasına təkan verdi.
Sonda mövzu ətrafında müzakirələr aparıldı.