18 Aprel Beynəlxalq Abidələr və Tarixi Yerlər Günü əlaqədar Kompleksə gələn balaca fidanlara bayram münasibətilə hədiyyələr təqdim olunub.
18 Aprel Beynəlxalq Abidələr və Tarixi Yerlər Günü ilə əlaqədar Kompleksə ziyarətçi axını davam etməkdədir.
Belə ki, Azərbaycan Milli Aviasiya Akademiyasının bir qrup müəllim və tələbə heyəti də Soyqırımı Memorial Kompleksini ziyarət ediblər. Onlara 1918-ci il soyqırımları haqqında məlumat verilmiş, eləcə də 18 Aprel Beynəlxalq Abidələr və Tarixi Yerlər Günü ilə əlaqədar Kompleks tərəfindən hazırlanmış 1918-ci il Quba rayonunda soyqırımların baş verdiyi tarixi məkanlar – abidələr haqqında xəritə – məlumat kitabçası, eləcə soyqırımlarla bağlı kitab və bukletlər təqdim olunmuşdur.
18 Aprel Beynəlxalq Abidələr və Tarixi Yerlər Günü ilə əlaqədar Azərbaycan Dövlət Pedaqoji Universitetinin Quba filialında 1918-ci il Quba rayonunda soyqırımların baş verdiyi tarixi məkanlar - abidələr haqqında xəritə - məlumat kitabçasının təqdimat mərasimi keçirilmişdir.
Quba şəhərində “Soyqırımı Memorial Kompleksi” tərəfindən hazırlanmış məlumat kitabçasında 1918-ci il soyqırımlarının baş verdiyi tarixi məkanlar – Tağlı körpü, Günbəzli hamam, Cümə məscidi, Qanlı dərə, Subaba türbəsi, Naməlum türk əsgərinin məzarlığı haqqında məlumat verilmişdir. Kitabça iki dildə (Azərbaycan və ingilis dillərində) nəşr olunub.
Azərbaycan Dövlət Pedaqoji Universitetinin Quba filialında keçirilmiş xəritə – məlumat kitabçanın təqdimat mərasimində universitetinin rektoru Yusif Alıyev və kollektivi iştirak etmişdir.
18 Aprel Beynəlxalq Abidələr və Tarixi Yerlər Günü ilə əlaqədar Kompleksə ziyarətçi axını davam etməkdədir. Gələn ziyarətçilərə soyqırımı hadisələri ilə yanaşı, əlamətdar gün münasibətilə Kompleks tərəfindən hazırlanmış kitab və bukletlərdən ibarət sərgi də təqdim olunmuşdur.
"Darkənd günbəzi"
Ordubad rayonunun Darkənd kəndində yerləşən Darkənd günbəzi kompozisiyası və dekorativ elementləri ilə fərqlənir. Darkənd günbəzi kərpicdən hörülmüş, orta hissəsi bürcvari türbələr formasında olub, yuxarı hissədən günbəzlə tamamlanır. Türbənin üzərindəki tünd-bənövşəyi rəngli keramika və adi bişmiş kərpicdən hörülmüş sadə naxışlar yeganə bəzək elementidir. Üzərində kitabə olmadığından türbənin tarixini dəqiq müəyyənləşdirmək mümkün deyildir. Lakin kompozisiya quruluşu, üzərindəki keramika bəzəklərinin rəngi abidənin Qarabağlar və Bərdə türbələrindən daha sonra tikildiyi mülahizəsini irəli sürməyə imkan verir. Bu mülahizəyə əsasən, Darkənd türbəsinin XIV əsrin sonlarında və ya XV əsrin əvvəllərində inşa edildiyi ehtimal olunur.
Azərbaycan Respublikasının Türkiyə Respublikasındakı Səfirliyi, Ege Universiteti, Quba şəhərində “Soyqırımı Memorial Kompleksi”, “Zəfər” Şəhid Ailələrinə Dəstək İctimai Birliyi və İzmir Azərbaycan Dərnəyinin birgə təşkilatşılığı ilə İzmir şəhərində yerləşən Ege Universitetində “Erməni problemi və XX əsrdə azərbaycanlılara qarşı törədilən qırğınlar və deportasiyalar” mövzusunda keçirilmiş konfransda iştirak etmək məqsədilə Türkiyə Respublikasının İzmir şəhərində səfərdə olan Soyqırımı Memorial Kompleksinin direktoru Dr.Rəxşəndə Bayramova, Kompleksin mütəxəssisi Dr.Sübhan Talıblı, və “Zəfər” Şəhid Ailələrinə Dəstək İctimai Birliyinin sədri Sevinc Orucova Ege Universitetinin rektoru prof.Dr.Necdet Budak və İzmir Şəhid Ailələrinə Dəstək Dərnəyinin üzvləri ilə görüşdə iştirak etmişlər.
Görüş zamanı XX əsrdə Azərbaycanlılara qarşı törədilmiş soyqırımlar və deportasiyalar haqqında müzakirələr aparılmış, soyqırımı hadislərinin tanıdılması istiqamətində ilə birgə fəaliyyət barədə razılaşmalar əldə edilmişdir.
Cənab Prezident İlham Əliyevin 25 dekabr 2023-cü il tarixli Sərəncamına əsasən elan olunmuş "Yaşıl Dünya naminə Həmrəylik ili" və sosial layihə çərçivəsində, "18 aprel Beynəlxalq Abidələr və Tarixi Yerlər Günü" ilə əlaqədar 16 aprel 2024-cü il tarixində Quba şəhərində "Soyqırımı Memorial Kompleksi"nin əməkdaşlarının iştirakı ilə Kompleks ərazisində ağac əkilmişdir.
İzmir Ege Universitetində XX əsrdə Azərbaycan xalqına qarşı törədilmiş soyqırımlarla bağlı konfrans keçirilib.
Azərbaycan Respublikasının Türkiyədəki Səfirliyi, Ege Universiteti, Quba şəhərində “Soyqırımı Memorial Kompleksi”, “Zəfər” Şəhid Ailələrinə Dəstək İctimai Birliyi və İzmir Azərbaycan Dərnəyinin birgə təşkilatçılığı ilə 15 aprel tarixində İzmir şəhərində yerləşən Ege Universitetində “Erməni problemi və XX əsrdə azərbaycanlılara qarşı törədilən qırğınlar və deportasiyalar” başlıqlı konfrans keçirilib.
Tədbir iki ölkənin dövlət himnlərinin səslənməsi və soyqırımı qurbanlarının xatirəsinin 1 dəqiqəlik sükutla yad edilməsi ilə başlanıb. Tədbirin açılışında çıxış edən “Zəfər” Şəhid Ailələrinə Dəstək İctimai Birliyinin sədri Sevinc Orucova, İzmir Azərbaycan Dərnəyinin (İZAZDER) İdarə Heyətinin sədri Pərviz Altay, Azərbaycan Respublikasının Türkiyədəki Səfirinin Təhsil məsələləri üzrə müşaviri Nəcibə Nəsibova, Ege Universitetinin prorektoru, Prof. Dr. Mehmet Ersan və öz nitqlərində bu tədbirin keçirilməsində əsas məqsədin Azərbaycan xalqına qarşı törədilmiş soyqırımlar barədə Türkiyə ictimaiyyətinin ətraflı məlumatlandırılması və Azərbaycan həqiqətlərinin Türkiyə gənclərinə çatdırılmasından ibarət olduğunu vurğulayıblar.
Açılış nitqlərindən sonra panel müzakirələri başlayıb. Konfransın moderatoru Ege Universitetinin Türk Dünyası Araşdırmalar İnstitutunun Türk Dünyası Sosial, İqtisadi və Siyasi Əlaqələr şöbəsinin müdiri Prof. Dr. Vefa Kurban ermənilərin tarixi Azərbaycan torpaqlarına köçürülməsi haqda məlumat verib. Daha sonra isə Ege Universitetinin Atatürk Əsasları və İnqilab Tarixi Tətbiq və Araşdırma Mərkəzinin müdiri Prof. Dr. Nuri Karakaş “Erməni problemi” mövzusunda geniş məruzı ilə çıxış edib. Quba şəhərində “Soyqırımı Memorial Kompleksi”nin direktoru, tarix üzrə fəlsəfə doktoru Rəxşəndə Bayramova “Azərbaycanlılara qarşı törədilmiş soyqırımların dünyaya çatdırımasında Azərbaycan dövlətinin siyasəti” mövzusunda nitqi zamanı qeyd edib ki, Ümummili lider Heydər Əliyev tərəfindən imzalanmış fərman və sərəncamlarda azərbaycanlılara qarşı törədilmiş soyqırımı və deportasiyalara ilk dəfə siyasi-hüquqi qiymət verilmişdir.
Quba şəhərində “Soyqırımı Memorial Kompleksi”nin mütəxəssisi, tarix üzrə fəlsəfə doktoru, dosent Sübhan Talıblı “XX əsrdə azərbaycanlılara qarşı soyqırımlar” haqda tarixi fakt, sənəd, dövrü mətbuat, azərbaycan və xarici dilli mənbələrə əsaslanaraq elmi məruzəsini konfrans iştirakçılarının diqqətinə çatdırdı.
Konfrans yerli ictimaiyyət və universitet tələbələri tərəfindən maraqla qarşılanıb.
Konfransın sonunda iştirakçılar azərbaycanlıların soyqırımı hadisələrini özündə əks etdirən kitab və fotoşəkillərdən ibarət sərgi ilə tanış olmuşlar.
"Əniq kənd məscidi"
Əniq kənd məscidi Qusarın eyniadlı kəndinin mərkəzində, onun nisbətən qədim hissəsində, hündür təpədə yerləşir. İbadətgaha “Mahalın Tacı” və ya “Tac Mahal” da deyirlər. Bunun səbəbi isə ibadət evinin Hindistandakı Tac Mahal məscidinə bənzəməsidir. İbadət evi Şeyx Abumüslümün vəsaiti hesabına, hicri-qəməri təqvimi ilə 1330-cu (1911) ildə inşa olunub. Bu məlumat məscidin mehrabının üstündəki divarında ərəb hərfləri ilə həkk olunub.
İbadətgah düzbucaqlı formadadır və çay daşlarından inşa olunmuşdur. Məscid geniş ibadət zalından ibarətdir. İbadət evinin divarları müxtəlif rəngli rəsmlər və naxışlı kompozisiyalarla bəzədilib. Bu rəsmlər yenilənməsə də, ilkin görünüşünü itirməyib. Rəsmlər təbii bitki köklərindən əldə edilən boyalarla çəkilib. İbadətgahın bir böyük və onu əhatə edən dörd balaca günbəzi var. Günbəz xaricdən naxışlı metalla örtülmüş, içəridən isə bəzəkli taxtalarla işlənmişdir.
Ehtimal edilir ki, bu məscid 300 yaşlı köhnə məscid binasının yerində inşa olunmuşdur.
31 Mart Azərbaycanlıların Soyqırımı Günü ilə əlaqadar anım tədbirindən görüntülər.
1918-ci il azərbaycanlıların soyqırımının 106-cı ildönümü ilə əlaqədar respublikanın müxtəlif təşkilat və müəssisələrinin əməkdaşları, ümumtəhsil müəssisələrinin müəllim, tələbə və şagirdləri Soyqırımı Memorial Kompleksini ziyarət edir.
31 Mart Azərbaycanlıların Soyqırımı Günü ilə əlaqədar olaraq Quba-Xaçmaz Regional Gənclər və İdman İdarəsinin təşkilatçılığı ilə respublikanın müxtəlif Gənclər və İdman İdarəsinin fəalları Quba şəhərində “Soyqırımı Memorial Kompleksi”ni ziyarət ediblər.
Qeyd edək ki, Gənclər və İdman Nazirliyinin tabeçiliyində olan Gənclər və İdman İdarələrinin fəalları Kompleksin təşəbbüsü ilə həyata keçirilən “Bir ağac, min nəfəs” aksiyasına qoşularaq yüzlərlə ağacın əkilməsinə töhfə vermişlər.
